Zimbabwe: Minisitiri w’Ububanyi n’Amahanga yahitanywe na COVID-19

Uwari Minisitiri w’Ububanyi n’Amahanga mu gihugu cya Zimbabwe, Dr. Sibusiso Moyo yitabye Imana kuri uyu wa 20 Mutarama 2021, azize icyorezo cya COVID-19.

Ni nyuma y’umunsi umwe apimwe bagasanga yaracyanduye nkuko byatangajwe n’umwe mu bagize umuryango we  ndetse n’itangazo ryaturutse muri Perezidansi ya kiriya gihugu.

Perezida wa Zimbabwe Emmerson Dambudzo Mnangagwa, kuri twitter ye yatangaje ko igihugu kibuze umuntu w’ingirakamaro, kandi w’intwari. Yongeyeho ati: “…kandi mbuze inshuti,… aruhukire mu mahoro”.

Dr. Sibusiso  Moyo ni umuminisitiri wa gatatu uhitanwe n’iki cyorezo muri  kiriya gihugu.

Abamaze kwandura COVID-19 muri Zimbabwe ni 28,675, abakize ni 18,110, abo imaze guhitana ni 825.