Umushumba wa Diyosezi ya Kabgayi Smaragde Mbonyintege, yahaye abageni babyifuza uruhushya rudasanzwe rwo guhabwa isakaramentu ry’ugushyingirwa mu gisibo, bitewe n’uko bagiye badindizwa n’icyorezo cya COVID-19.
Ni uruhushya rudasanzwe kuko amategeko ya Kiliziya Gatolika ateganya ko ugushyingirwa ari rimwe mu masakaramentu adatangwa mu gihe cya Adiventi ndetse n’igisibo, kereka ku mpamvu zidasanzwe kandi na bwo umwepisikopi yabitangiye uruhushya.
Mu itangazo yashyizeho umukono, Musenyeri Smaragde Mbonyintege yagize ati :” Ku mpamvu y’icyagirira akamaro roho z’abakirisitu muri ibi bihe bidasanzwe, maze kandi gusanga hari abageni bagiye babana badasezeranye imbere y’Imana abandi bikaba ngombwa ko bimura kenshi amataliki y’ugushyingirwa kwabo, bitewe n’ingamba zo kwirinda ikwirakwira ry’icyorezo cya COVID-19, nzirikanye kandi ko abo bose bahuye n’izo ngorane bagomba gufashwa kugira ngo igisibo cyabo gitungane kandi bazizihize Pasika uko bikwiye”.
Yakomeje agira ati: “Nshingiye kandi ku bubasha mpabwa n’amategeko ya Kiliziya […], ntanze uburenganzira bwo gushyingirwa ku bageni bazasaba iryo sakaramentu bose, muri ibi byumweru bitatu bya mbere by’Igisibo. Ni uguhera ku wa 23 Gashyantare kugeza ku wa 15 Werurwe 2021, abageni bakaba bazarangwa mu cyumweru kimwe gusa”.
Hagaragaramo kandi ko abazaba baracikanwe n’iki gihe kidasanzwe cy’Impuhwe z’Imana Kiliziya itangaje, bazategereza gusezerana imbere y’Imana nyuma y’Umunsi mukuru wa Pasika.
Uru ruhushya ruje nyuma y’uko mu byemezo by’Inama y’Abaminisitiri iheruka yo ku wa 19 Gashyantare 2021, hemejwe ko insengero zujuje ibisabwa mu kwirinda COVID-19 zongera gufungura n’ishyingirwa rikorewe imbere y’ubuyobozi no mu nsengero rigakomorerwa, ariko bikitabirwa n’abantu batarenze 20, kandi hakubahirizwa ingamba zo kwirinda iki cyorezo. Ibirori byo kwiyakira ariko byo birabujijwe.
