Umudepite yagereranyije na ‘Jenoside’ gutanga udukingirizo tujuje ubuziranenge mu gihugu

Umudepite muri Zambia yagereranyije na ‘Jenoside’ gutanga udukingirizo n’uturindantoki bitujuje ubuziranenge mu gihugu.

Depite Mwansa Mbulakulima yabwiye BBC ducyesha iyi nkuru  ati: “Ibyo minisiteri y’ubuzima iri gukora ni jenoside.

“Iyo ushyize amazi muri utwo turindantoki n’udukingirizo, birava. Hamaze gupfa abantu bangahe kuva mu kwezi kwa cyenda kubera uko kutita ku bintu.”

Uyu mudepite yavugaga impungenge atewe n’ikwirakwira ry’indwara zandurira mu mibonano mpuzabitsina, hamwe na coronavirus.

Mbulakulima na bagenzi be mu nteko kuwa gatatu babwiwe uburyo kompanyi yitwa Honey Bee yo mu gihugu, yabonye isoko rya miliyoni $17 ryo kuzana udukingirizo n’uturindantoki.

Ibyo bazanye bakabitanga nyuma basanze bitujuje ubuziranenge.

Mbulakulima ati: “Utwo turindantoki dukoreshwa n’abantu bari imbere ku rugamba rwo kurwanya Covid kandi twatanzwe mu gihugu hose kandi dufite ikibazo.”

Ukuriye iyi kompanyi witwa Imran Lunat yashinje umugenzuzi w’imari ya leta kubogama muri raporo ye ivuga ko iyo kompanyi itanafite ahantu ikorera, nk’uko ikinyamakuru cya leta Daily Mail kibivuga.

Igenzura kandi ngo ryasanze iyo kompanyi yarahawe amasezerano ari ku cyumweru, umunsi utari uw’akazi wemewe mu gihugu.

Kakulubelwa Mulalelo, ushinzwe ibikorwa muri minisiteri y’ubuzima yabwiye komite y’Abadepite ko atazi umuntu watanze ayo masezerano, ko yagiye gusa gutangiza itangwa ry’ibyo bikoresho.

Madamu Mulalelo yavuze ko minisiteri “yicuza” ibyabaye, mu gihe abategetsi mu kigo gishinzwe imiti n’ikigo gishinzwe ubugenzuzi bw’ibikoresho bemera ko habaye amakosa mu gutanga isoko.

Bamwe mu baturage ba Zambia kuri Twitter bagaragaje umujinya batewe no kumenya ibyabaye: