Perezida wa Uganda Yoweri Kaguta Museveni, yavuze ko Leta yafashe icyemezo cyo gufunga imbuga nkoranyambaga muri ibi bihe biteguye amatora y’Umukuru w’Igihugu yiteguwe kuri uyu wa Kane tariki ya 14 Mutarama 2021.
Abaturage ba Uganda benshi bahamya ko guhera ku wa Kabiri imbuga nkoranyambaga zabo za Facebook na WhatsApp zitarimo gukora, ndetse binavugwa ko n’urwa Twitter rwabigendeyemo.
Perezida Museveni yanenze Facebook n’itsinda yise iry’abibone ryahagaritse konti Leta yifashishaga mu kwamamaza umukandida w’ishyaka NRM riri ku butegetsi ryiteguye kongera kuyobora iki Gihugu muri manda y’imyaka itanu izarangira mu 2026.
Mu ijambo yagejeje ku batuye Igihugu cya Uganda ku wa Kabiri tariki ya 12 Mutarama, Perezida Museveni yagize ati: “Urwo rubuga nkoranyambaga muvuga rwa Facebook, niba rugomba gukorera muri Uganda rukwiye kuba rukoreshwa na buri wese ukeneye kurukoresha.”
Yakomeje agira ati: “Niba rufashe uruhande rwo kurwanya ishyaka riri ku butegetsi, bivuze ko urwo rubuga rutazakomeza gukorera muri Uganda.”
Perezida Museveni wari wambaye imyambaro ya Gisirikare, yavuze ko azi neza ko Leta ya Uganda yafunze Facebook [na WhatsApp…], anisegura ku baturage ba Uganda kuri icyo kemezo yise ikitamuturutseho.
Ku wa Mbere ni bwo Facebook yatangaje ko yakuye ku murongo konti na paji zose zifashishaga amafoto n’amazina y’amahimbano mu gukurikirana ibyo abandi baturage batangaza ku mbuga nkoranyambaga, kwiyitirira abandi bantu, gukwirakwiza ibikorwa by’amatora mu matsinda menshi yashyiriweho kwiyamamaza kugira ngo bigere ku bantu benshi kandi byose bikozwe n’Urwego rwa Leta.
Nyuma y’aho Museveni atangarije ko urwo rubuga rwahagaritswe muri Uganda, kugeza ubu ubuyobozi bwa Facebook ntiburagira icyo butangaza.
Hari abafite impungenge ko ku munsi w’ejo w’amatora na murandasi (internet) ishobora guhagarikwa burundu. Museveni yagize ati: “Birababaje ariko ntitwabisubiza inyuma. Nta mpamvu n’imwe yatuma umuntu aza agakina n’Igihugu cyacu , ashaka kwemeza uri mu kuri, cyangwa utari mu kuri. Ibyo ntitwabyemera, sinakwihanganira ubwo bwirasi.”
Museveni wayoboye Uganda guhera mu mwaka wa 1986, yakunze kunenga amatsinda y’abanyamahanga aba ashaka kuvangira amatora yo mu Gihugu ayoboye ariko bikagorana kugaragaza ayo matsinda ayo ari yo.
Ashinja Bobi Wine, umuhanzi w’icyamamare wifuza kuyobora Uganda bakaba bahanganye, kuba umwe mu bahagarariye inyungu z’abo banyamahanga nubwo Bobi Wine we atera utwatsi ibyo birego.
Mu gihe habura amasaha make ngo amatora abe, ikirere cyo muri Uganda giteye benshi impungenge, cyane ko polisi n’abasirikare banyanyagiye imihanda hafi ya yose mu Murwa Mukuru wa Kampala aho abasirikare ari bo bafite mu nshingano gucunga umutekano w’Umujyi wose.
Bobi Wine, amazina ye nyakuri ni Kyagulanyi Ssentamu, yatangaje ko ukwiyamamaza kwe kutagamije guteza umutekano muke, asaba abamushyigikiye kudacika intege babitewe n’uko babona abasirikare bitwaje intwaro banyanyagiye ahantu hose.
Ku wa Kabiri, Kyagulanyi Ssentamu yiyunze ku mbaga y’abandi batavuga rumwe n’ubutegetsi bwa Uganda banenga uburyo abasirikare bakomeje guhohotera rubanda byitwa ko bacunga umutekano, no guharanira gushyira mu bikorwa ingamba zo kwirinda icyorezo cya COVID-19.
Yabwiye itangazamakuru ko abasirikare bateye mu rugo rwe mu gitondo, bagafunga abamucungiye umutekano ndetse bagasiga bahondaguye abakozi babiri bakataga ubusitani bw’iwe mu rugo.
Undi uri mu batavuga rumwe na Leta ya Museveni ni Kizza Besigye, wagize ati: “Leta irakora ibikorwa by’iterabwoba bitigeze bibaho. Akarengane, iterabwoba bishobora kwiyongera ku munsi w’amatora . Aya matora yabayemo urugomo rutigeze ruvugwa, kandi rugenda rwiyongera umunsi ku wundi.”
Abantu basaga 54 ni bo bavugwa ko bishwe mu Gushyingo mu itsinda ry’abayobotse imihanda bigaragambiriza ifatwa rya Bobi Wine; byitwa ko bahagaritswe babuzwa gukwirakwiza icyorezo cya COVID-19 bakinangira.
Amatora muri Uganda azwiho kuba atarigera aba mu mutuzo guhera mu mwaka wa 1962 ubwo Igihugu cyabonaga ubwigenge kivuye mu bukoloni bw’u Bwongereza. Mu myaka 59 ishize, icyo gihugu ntikirabona ihererekanyabubasha ry’ubuyobozi rikozwe mu mahoro.
