Perezida wa Repubulika y’u Rwanda Paul Kagame n’Umuryango we bifurije Abanyarwanda, abaturarwanda n’inshuti z’u Rwanda Umwaka Mushya Muhire wa 2021, abifuriza kuzawubonamo uburumbuke.
Ni mu ijambo risoza umwaka wa 2020 no gutangiza uwa 2021 yagejeje ku Baturarwanda kuri uyu wa Kane tariki ya 31 Ukuboza ahagana saa tatu z’ijoro.
Yagize ati: “Dutangiye uyu mwaka dufite ikizere kuko u Rwanda rwageze kuri byinshi, nubwo twahuye n’ibibazo bidasanzwe mu mwaka wa 2020. Ibi bivuze ko dushobora gukora n’ibirenze, igihe iki cyorezo kizaba kitagihari.”
Yakomeje avuga ko isomo Abanyarwanda bakuye muri uyu mwaka ushize ari uko iyo bitwaye neza bagashyira hamwe ntawushobora kubahungabanya.
Yakomeje agira ati: “Twese tugomba gukomeza kuba maso mu mezi ari imbere igihe urukingo rwa COVID-19 rutaratugeraho. Kubera imbaraga zanyu, ubushake no gukunda Igihugu twese dufite, uyu mwaka utangiye uzaba mwiza kurusha uwo dusoje. Twirinde rero buri wese yite ku bandi. ”
Mu butumwa bugufi yatangaje, yahishuye ko ubutumwa yateguye bwari ubwo kwifuriza Abanyarwanda, abaturarwanda n’inshuti z’u Rwanda Umwaka Mushya Muhire wa 2021 gusa.
Ati: “Mu by’ukuri iri Jambo ryari iryo gusoza umwaka no gutangiza undi, naho ibindi twabivuze ubwo nabagezagaho uko Igihugu gihagaze. Njye n’umuryango wanjye tubifurije mwese n’abanyu Umwaka Mushya Muhire wa 2021, uzababere uw’uburumbuke. Mugire Umugisha w’Imana.”
Tariki ya 21 Ukuboza 2020, ubwo yagezaga ijambo ku Baturarwanda ndetse rigaragaza isura y’Igihugu n’uko gihagaze mu gihe cyo gusoza uyu mwaka, Perezida Kagame yatangaje ko nubwo u Rwanda rwagezweho n’ingaruka z’icyorezo cya COVID-19 muri uyu mwaka wa 2020 ntacyarubujije guhagarara neza mu nzego zose.
Umukuru w’Igihugu yashimiye inzego zitandukanye, n’Abanyarwanda muri rusange bagaragaje ubwitange n’ubufatanye mu guhangana n’ibibazo, ashimangira ko byose byubakiye ku muco w’Abanyarwanda wo kunga ubumwe, na poritiki yo gukorera hamwe.
Ati: “Twabonye akamaro k’imbaraga u Rwanda rushyira mu bikorwa bitandukanye byongereye ubutwari no kwihangana Abanyarwanda basanganywe bifasha no guhangana n’ingaruka z’iki cyorezo.”
Umwaka ushize u Rwanda rukiri mu bihugu ku Isi byatanze urugero rwiza mu rugamba rwo guhashya icyorezo cya COVID-19 bikaba biri no mu byatumye rugirirwa ikizere mu bihugu bikiri mu nzira y’amajyambere byiteguye kubona urukingo bwa mbere.
