Nyaruguru: Uko gutunganya ibishanga no guca amaterasi y’indinganire byazamuye imibereho y’abaturage.

Ni muri gahunda ya Leta y’u Rwanda yo kwita ku mirimo y’ubuhinzi bwa kijyambere, umusaruro ukiyongera mu bwinshi no mu bwiza, kuwongerera agaciro, kuwuhunika no ku wushakira isoko, ku buryo abahinzi babuhindura umwuga ubatunze, no kububyaza indi mirimo itari ubuhinzi, mu guteza imbere Igihugu muri rusange.

Ni muri uru rwego hirya no hino mu Gihugu hashyirwa ingufu mu kunoza ubuhinzi, hakoreshejwe guhuza ubutaka, kuburinda isuri, gukoresha imbuto z’indobanure n’inyongeramusaruro zikwiye, cyane cyane mu materasi y’indinganire, guhingisha imashini aho bishoboka no kuhira imyaka mu bishanga no ku misozi.

Abaturage bashishikarizwa guhinga ibihingwa bibafitiye akamaro kurusha ibindi bitewe n’Akarere n’imiterere y’ubutaka bahingaho (Comparative advantage)

Akarere ka Nyaruguru muri uru rugamba rw’iterambere, ni Akarere nako kaberanye n’ubuhinzi, ubutaka busharira bwafatwaga nk’ikibazo, ubu ni ubutaka bwiza buberanye n’ibihingwa Ngengabukungu na Ngandurarugo by’umwihariko igihingwa cy’ibirayi.

Ntabwo ariko ibi byizanye, Bituruka ku bushake bwa Politiki nziza ya Nyakubahwa Perezida wa Repubulika y’u Rwanda Paul Kagame, mu kuzahura imibereho myiza y’Abanyarwanda.

Ubuyobozi bw’Akarere ka Nyaruguru buvuga ko bushingiye kuri iyi Polititiki, bwafashe ingamba zitandukanye, hagamijwe guteza imbere ubuhinzi, kugira ngo bifashe abaturage kwikura mu bukene.

Muri zo, harimo kuba haratunganijwe amaterasi y’indinganire angana na hegitali 5571.34 I musozi zakozwe kuva 2011, ibishanga bitunganije bingana na hegitali 575, zakozwe hagati ya 2013 na 2014, ubukangurambaga mu guhugura abahinzi, kubereka uko bahinga bya kijyambere, gutera imbuto z’indobanure kandi ku gihe, gukoresha inyongeramusaruro no gukurikirana ibikorwa by’ubuhinzi buri munsi.

Abaturage begerezwa imbuto

Ibi byatumye umusaruro w’ibirayi uzamuka uva kuri toni 14 ugera kuri 25 kuri hegitali imwe, hari n’aho birenga zikagera kuri 29.

Mu gishanga gitunganije, gutera imbuto y’indobanure ku gihe, gukoresha inyongeramusaruro, byatumye umusaruro uva kuri toni 14 ugera kuri 25, hari n’aho zigera kuri 29

Akarere gafatanije n’Abafatanyabikorwa bako, batunganya amaterasi mu mirima y’abaturage, bagatunganya ibishanga, bagaha imbuto n’imvaruganda abaturage, hakibandwa ku bakene kandi bagafashwa gufata neza umusaruro wabo, kugira ngo ku ihinga rikurikiyeho ubwabo bazabe bifitiye imbuto.

Bwana Gashema Janvier, Umuyobozi w’Akarere Wungirije Ushinzwe Iterambere ry’Ubukungu mu Karere ka Nyaruguru

Ku murongo wa Telephone, mu kiganiro twagiranye n’Umuyobozi w’Akarere Wungirije Ushinzwe Iterambere ry’Ubukungu muri aka Karere, Bwana Gashema Janvier, yatubwiye ko ku bijyanye n’imbuto, nta kibazo bagira ko hari Koperative ebyiri, iyitwa “Jyambere Muhinzi” yo mu Murerenge wa Kibeho na KAIMU yo mu Murenge wa Muganza, batubura imbuto zihabwa abaturage.

Ati:” Abaturage tubaha imbuto y’ibirayi, dufite Koperative zizitubura, hari “KAIMU” yo mu Murenge wa Muganza na “Jyambere Muhinzi” yo mu Murenge wa Kibeho, babikora neza, bari ku rwego rwo gupiganira amasoko yo kugemura imbuto z’ibirayi.

Ntibarabasha guhaza Akarere kose ku mbuto, ariko intego dufite ni ukubafasha kubaka ubushobozi ku buryo nta mbuto z’ibirayi zizongera kuva ahandi, ahubwo bakazajya bahaza Akarere bagasagurira n’ahandi”

Yongeyeho ati:” Ndaguha urugero, muri uyu mwaka w’Ingengo y’Imari ya 2019/2020, twatunganije amaterasi y’indinganire angana na hegitali 300, dutunganya n’ibishanga bingana na hegitali 90, imbuto twahaye abaturage, nibo bazitanze”

Ibirayi byahinzwe mu materasi mu Murenge wa Busanze biratanga icyizere mu guhaza abahinzi ndetse n’isoko muri rusange

Kubijyanye n’isoko, uyu muyobozi avugako nk’Ubuyobozi bahuza abahinzi n’abakeneye ibirayi, yongeraho ko ibirayi bituruka muri aka Karere bimaze kumenyekana ku isoko kubera uburyohe byihariye, Ati:” Ku isoko, ibindi birayi bigurwa ibyaturutse Nyaruguru birangiye, kubera uburyohe bimaze kumenyekanaho”

Ubuhinzi muri rusange, bwateje imbere cyane imibereho myiza y’abaturage mu kurwanya imirire mibi no kwiteza imbere mu by’ubukungu.

Ikindi, bwatumye haremwa indi mirimo mishya, nk’uruganda rwubatse mu Murenge wa Kibeho rwa Koperative “Jyambere Muhinzi” imwe twavuze haruguru. Ni uruganda rutsya akawunga k’ibigori nabyo byera muri aka Karere

Abahinzi b’ibirayi bo mu Karere ka Nyaruguru, bavuga ko bamaze kubona ibyiza byo gukora ubuhinzi bwa kijyambere, bakavuga ko umusaruro babonaga wiyongereye, bagasaba ababa bagikora ubuhinzi busanzwe guhindura bagakora bubahiriza inama bagirwa ko aribwo bazabona umusaruro ushimishije.

Ni abaturage bo mu Murenge wa Ruheru, Akagali k’Umusebeya, mu Mudugudu w’Uwimbogo, bemeze ko bari bakennye, ariko uyu munsi umusaruro bakura mu buhinzi bw’ibirayi ushimishije ko byabazaniye iterambere.

Abaturage bashobora kuhira ibirayi mu mirma

Nyiranziza Odette Ati:” Nakubwira ko aho ubuyobozi butangiriye kutwegera, amateka yarahindutse, umusaruro tutabonaga ukaboneka, kuko uyu munsi iyo uhinze ku materasi, aragenda agafata amazi y’imvura kandi agatindamo, ariko n’ifumbire nayo wayikoresha, ikamaramo igihe kirekire kuko iba itatwawe n’isuri, ibyo byose bikongera umusaruro”

KAMANZI Umuhinzi ntangarugero, Umurenge wa NYABIMATA, yahinze ibirayi kuri hegitali 2, avuga ko umusaruro udashobora kujya munsi ya toni 50

Nsabimana Japhet wakorewe materasi y’inganire mu murima we ati:” Hashize imyaka ibiri bankoreye amaterasi y’indinganire mu isambu, ariko umusaruro nabonaga wariyongereye cyane, kuberako ubutaka, icya mbere baba baburinze gutwarwa n’isuri, ifumbire iyo uyishyizemo igumamo. Ariko bakidukorera amaterasi bwa mbere, ubuyobozi bwahise buduha imbuto nziza, buduha ishwagara n’imvaruganda baranaduterera”.

Ubuyobozi busoza busaba abaturage kubyaza umusaruro amaterasi n’ibishanga batunganirijwe, kubifata neza, kuko impinduka nziza mu buhinzi ziri muri aka Karere, inyinshi bazikesha amaterasi n’ibishanga byatunganijwe, kandi uko ubushobozi buzaboneka hazatunganywa n’andi.