Mu butumwa Polisi y’Igihugu yanyujije kuri Twitter yatangaje ko yataye muri yombi Karegeya Jean Marie Vianney Umunyamabanga Nshingwabikorwa w’Umurenge wa Kibeho, ukekwaho kunyereza umutungo wa Leta.
Ubutumwa bwa Polisi bugira buti:”Mwiriwe, Twafashe Karegeya Jean Marie Vianney, Umunyamabanga Nshingwabikorwa w’Umurenge wa Kibeho, ukekwaho kunyereza amafaranga y’u Rwanda miliyoni 30 yari ateganyirijwe kubaka ibyumba by’amashuri.
Polisi ikomeza itangaza ko uyu muyobozi afungiye kuri Sitasiyo ya Polisi ya Kibeho mu gihe iperereza ririmo gukorwa n’urwego rubishinzwe.
Mu Karere ka Nyaruguru ni kenshi hagiye humvikana inkuru zo kutihanganira na mba abanyereza umutungo wa Leta.
Ku wa 21 Gicurasi 2020, uwitwa Kanyarwanda wari Umunyabanga Nshingwabikorwa w’Umurenge wa Kivu yatawe muri yombi aregwa kunyereza imbuto y’ibirayi n’ifumbire mvaruganda byagenewe abaturage bakorewe amaterasi y’indinganire.
Hatawe muri yombi kandi aba Agronome bo mu Mirenge ya Ruheru na Nyabimata ku cyaha cyo kunyereza ibyagenewe abaturage bigizwe n’imbuto y’ibirayi n’ifumbire mvaruganda byari gukoreshwa mu materasi ndinganire.
Ku wa 12 Kamena nabwo kandi hongeye gutabwa muri yombi uwari Gitifu w’Akarere witwa Ruzima Serge n’uwari ushinzwe Imirimo Rusange ( Division Manager) mu Karere witwa Nsengiyumva Innocent baregwa gutanga amasoko ya Leta binyuranije n’amategeko, kwaka no kwakira Ruswa, Kunyereza umutungo wa Leta, Gukoresha inyandiko mpimbano no gukoresha ububasha bahabwa n’Itegeko mu nyungu zabo bwite.
Ku wa 17 Kamena, uwitwa Uzarazi Evode Umukozi wari ushinzwe ubuzima akaba no mu kanama gashinzwe amasoko nawe yatawe muri yombi.
