Nyaruguru: Ba Mudugudu bashoje umwaka babyinira k’urukoma

Aba bayobozi 132, bayobora Imidigudu yo mu Mirenge ya Busanze, Cyahinda, Nyagisozi, Ngoma, hakiyongeraho n’umwe wo mu mirenge ya Mata, Ngera, Rusenge na Kivu, bahawe aya magare mu rwego rwo kubunganira mu kuzuza inshingano zabo by’umwihariko ku nkiko z’igihugu, gukurikirana imibereho myiza y’abo bayobora, kurwanya ihohoterwa iryo ari ryo ryose, n’ubukangurambaga mu kurwanya COVID-19.

Aba bayobozi bo mu Midugudu ibarizwa mu Mirenge ikora ku mupaka, bitwa Imboni z’umupaka, aya magare bahawe aje yiyongera kuyandi Perezida wa Repubulika Paul Kagame aherutse guha ba Mudugudu 93 bo mu Mirenge ya Muganza, Nyabimata na Kivu mu rwego rwo kubashimira ibikorwa byabo by’indashyikirwa mu mu kuzuza inshingano zabo n’uburyo bafasha abaturage mu bikorwa byo kwibohora. 

Ubuyobozi w’Akarere ka Nyaruguru n’Inzego z’Umutekano bashyikirije amagare aba bayobozi 132, ni igikorwa bafatanijemo n’umushinga Plan International/Rwanda wari uhagarariwe na Bwana Ndikubwimana Leon Fidele.

Plan Rwanda ni umuryango mpuzamahanga, ukaba umufatanyabikorwa w’Akarere ka Nyaruguru.

Ndikubwimana Leon Fidele, yibukije Imboni z’Umupaka zahawe inyoroshyangendo y’amagare, ko ku bufatanye n’Akarere kabo ari igikorwa bamaze igihe bategura bashingiye ku bibazo bahura nabyo mu kazi kabo ka buri munsi by’Umwihariko nk’Imboni z’umupaka.

Ati:” Ni igikorwa tumaze igihe dutegura ku bufatanye n’Akarere, twashingiye ku bintu bine twabonye ko twabafashamo kugira ngo mwuzuze neza inshingano zanyu za buri munsi”.

1. Dutanze aya magare kugira ngo dufatanye n’abakuru b’Imidugudu b’Imboni z’Umupaka mu kazi kabo ka buri munsi bagira ko gukurikirana no kubungabunga umutekano w’igihugu mu midugudu yabo, gukurikirana imibereho myiza y’abaturage, guharanira imiyoborere myiza y’Igihugu kidutoza buri munsi, no hugaranira iterambere ry’umuturage;

2. Aya magare azabafasha kurwanya ihohoterwa iryo ariryo ryose, cyane cyane irishingiye ku gitsina rikorerwa mu ngo, by’umwihariko ku bana;

3. Aya magare azabafasha kureba abana bafite ibibazo binyuranye n’abari mu kaga ko kuba bahura nabyo birimo n’ihohoterwa, mukadufasha no gushyiraho ingamba zo kubirwanya ngo bicike burundu;

4. Aya magare kandi ni azabafasha mu ngendo zo gukora ubukangurambaga bwo kurwanya COVID-19 kuko tuzi ko hari abadohotse mu kubahiriza ingamba zo guhashya iki cyorezo.

Meya Habitegeko François Umuyobozi w’Akarere ka Nyaruguru

Bwana Habitegeko François Umuyobozi w’Akarere ka Nyaruguru, yavuze ko abayobozi b’Imidugudu yo mu Mirenge ikora ku mupaka bahawe amagare nk’inyoroshyangendo mu kunoza akazi kabo no kubashimira akazi kabo bakoze neza muri manda yabo igana ku musozo.

Meya Habitegeko ati:”Ni ishimwe rya Nyakubahwa Umukuru w’Igihugu, yabashimiye ku kazi keza bakoze, ni ukugaragaza ko ibyo bakora bihabwa agaciro, icyo twabasaba ni ugukomeza kwitangira igihugu buzuza inshingano zabo neza, ni abayobozi b’abakorerabushake, batowe n’abaturage bagenzi babo babagirira ikizere, turabasaba kudatatira icyo kizere bagiriwe, igihango baba baragiranye n’Umukuru w’Igihugu ndetse n’abaturage”

Aya magare azafasha abayobozi b’Imidugudu by’umwihariko Imboni z’Umupaka, kugera ku baturage igihe basuzuma amarondo, kwita ku ngo bayobora hagamijwe gukumira no kurwanya ihohoterwa rikorerwa abana, anabafashe gukukurikirana izindi gahunda za Leta zikorerwa aho bayobora.

Nyirakanani Vestina wo mu Kagali ka Nkanda, Umurenge wa Busanze, umwe mubahawe igare, avuga ko igare rizamufasha kujya areba Umudugudu uko wiriwe n’uko waramutse.

Ati:”Mbonye inyunganizi mu kazi, bizanyongerera ubushake n’ubushobozi byo gukunda Igihugu, nagiraga imbogamizi zo kugera ku baturage bitinze, nzagera ku bakobwa b’abangavu mbagire inama yo kwirinda batiyandarika, iri gare rizamfasha gushaka amakuru kandi nyatange byihuse, ibyo twakoraga tugiye kurushaho kubinoza”.

Kozivuze Appolinaire umaze imyaka 18 ayobora Umudugudu wa Gisoro, Akagali ka Nteko, Umurenge wa Busanze, avuga ko yishimiye ishimwe ahawe rizamufasha mu mirimo akora.

Ati:” Mu mirimo nakoraga habagamo imvune mu ngendo, ndishimye kuko mbonye igare nzajya ngendaho, bizandinda gukerera, noroherwe ku mvune nahuraga nazo, nk’imboni y’umupaka, nzakomeza kuba ijisho ry’umupaka namagana abagizi ba nabi baza guhungabanya umutekano wacu, iri gare rizamfasha kuzenguruka Umudugudu ngenzura amarondo yaba aya ku manywa na ni joro ngere ahabereye igikorwa mbone amakuru ntanga ku gihe kandi nayahagazeho atari impuha”.