Impunzi z’Abarundi iziri mu Rwanda zirasabirwa inkunga

Ishami ry’Umuryango w’Abibumbye ryita ku Mpunzi (UNHCR) rifatanyije n’imiryango y’abafatanyabikorwa 33, barimo gukusanywa miliyoni 222 z’amadolari y’Amerika (asaga miliyari 217 z’amafaranga y’u Rwanda) yo gufasha impunzi z’Abarundi zahungiye mu Rwanda, Uganda, Tanzania na Repubulika Iharanira Demokarasi ya Congo (RDC).

Ubuyobozi bwa UNHCR bwatangaje ko iyo nkunga irimo gukusanywa igamije gufasha impunzi z’Abarundi zisaga 315,000 zibarurwa muri ibyo bihugu muri uyu mwaka wa 2021.

Buvuga ko mu myaka igera kuri irindwi ishize, ibyo bihugu byagaragaje ubugiraneza bwihariye bwo kwakirana urugwiro izo mpunzi zahungaga umutekano muke warangwaga mu Burundi.

Mu gihe impinduka mu buyobozi bw’Igihugu zatanze icyizere ko abenshi mu bakiri impnzi bashobora kuzatahuka, umubare munini w’Abarundi uzakomeza gukenera kurindwa n’Umuryango Mpuzamahanga muri uyu mwaka wa 2021.

Gushakisha inkunga ijyanye no gutegura imibereho y’impunzi zitaratahuka, bikubiyemo kubategurira ibyo bashobora kuzarya umwaka wose, kubategurira amacumbi ndetse n’uburezi kimwe no kubafasha koroherwa no kugera kuri serivisi z’ubuvuzi, amazi meza nka bimwe mu by’ingenzi bikenewe byafasha no mu kwirinda ikwirakwizwa ry’icyorezo cya COVID-19.

Clementine Nkweta-Salami, Umuyobozi muri UNHCR ukuriye Akarere k’Iburasirazuba, Ihembe ry’Afurika n’ak’Ibiyaga Bigari, yagize ati: “Kongera imfashanyo y’umuryango mpuzamahanga ni ingenzi mu guharanira ko impunzi z’Abarundi zikomeza kubona uburinzi busobanutse kandi ko zitaweho neza mu bihugu by’abaturanyi. Kwiyemeza gutanga ubwo bufasha ni ikimenyetso gikomeye cy’uburyo Isi itigeze yibagirwa impunzi z’Abarundi n’ibihugu byemeye kubacumbikira.”

Gahunda yo gushakira imfashanyo izo mpunzi, ikomeje kujyana n’iyo gufasha abifuza gutahuka ku bushake kugerayo amahoro no gusubira mu buzima busanzwe nta mananiza, cyane ko bakurikiranwa n’iyo bageze mu miryango yabo kugira ngo hasuzumwe uko babasha kwisanga no gufatanya n’abandi kubaka Igihugu cyabo.

Mu mwaka wa 2020, ubusabe bwo gufasha impunzi z’Abarundi bwari mu mishinga y’imbere itaratewe inkunga ku buryo budahagije. Mu gihe hari hakenewe miliyoni 293 z’amadolari y’Amerika (asaga miliyari 290 z’amafaranga y’u Rwanda) habonetse 40% byayo gusa.

Ibyo ngo byateye ingaruka zigaragara ku mibereho y’impunzi ndetse n’imiryango ituranye n’inkambi bacumbitsemo. Muri izo ngaruka harimo kugabanya ingano y’ibiribwa bahabwaga, kuba hari abagituye mu macumbi mabi cyane, kutabonera imiti ku gihe ndetse no kuba mpunzi zarabuze amahirwe yo kugera ku mirimo ibabyarira inyugu.