Imikino: Mvukiyehe Juvénal izina ridasanzwe rinzwi muri ruhago, niwe watorewe kuybora Kiyovu Sports

Uyu munsi tariki ya 27 Nzeri 2020 mu cyumba cya sitade ya Kigali Nyamirambo, nibwo hasojwe amatora y’abagize komite nshya y’ikipe ya Kiyovu Sports, aho Mvukiyehe Juvénal yatorewe kuyobora iyi kipe nk’uko byari byitezwe na benshi bakurikiranira hafi ruhago nyarwanda, dore ko yari n’umukandida umwe kuri uyu mwanya.

Hari hashize igihe benshi mu bashaka impunduka bifuza ko Mvukiyehe Juvénal wari mu bayoboye Komisiyo yo kugura abakinnyi muri Kiyovu Sports, agirwa umuyobozi w’ikipe nyuma yo kugaragaza ubushobozi bw’amafaranga ndetse akaba aherutse kugura imodoka bivugwa ko izajya itwara abakinnyi b’ikipe.

Ku rundi ruhande hari abatamushakaga bifuza ko ikipe ikomeza kuyoborwa na Mvuyekure François dore ko n’ubundi Mvukiyehe mbere atari umunyamuryango wa Kiyovu Sports, yemerewe kuba umunyamuryango mu nteko rusange y’iyi kipe yabaye ku wa 23 Kanama 2020.

Muri iyo nteko rusange yemerejwemo Mvukiyehe Juvénal nk’umunyamuryango ndetse akaba yaragize uruhare mu kuza muri Kiyovu Sports k’umutoza Karekezi Olivier, yagize ati “Mu minsi nabaye muri Komisiyo yo kugura abakinnyi hari ibintu by’amafuti nabonye muri Kiyovu Sports byakabaye bihinduka niba mushaka ikipe ya 2020.”

Muri iyo nteko rusange igingo yo kungurana ibitekerezo byo kureba niba amatora yaba, Mvukiyehe Juvénal akinjira mu buyobozi, ni yo yafashe umwanya munini w’abakunzi ba Kiyovu Sports kuko bayimazeho amasaha arenga atatu.

Gusa n’ubwo byari bimeze gutyo byasabaga Mvukiyehe kuba amaze amezi atandatu ari umunyamuryango kugira ngo yemererwe kujya mu buyobozi.

Gusa nyuma yaho Juvénal yemerewe kwiyamamaza biturutse ku ibaruwa umuyobozi wa komisiyo iri gutegura amatora ya Kiyovu S.A, Me Jean Claude Mutabazi Abayo, yandikiye Urwego rw’Igihugu rw’Imiyoborere (RGB) kuwa gatanu w’icyumweru turimo gusoza, aho yagishaga inama ku inyuranya ry’amategeko agenga uyu muryango.

Me Abayo yagaragarije RGB ko ingingo ya 5 mu mategekoshingiro inyuranya n’iya 19 mu mategeko ngengamikorere ku burenganzira bw’abanyamuryango ba Kiyovu Sports Association, aho ingingo ibanza yemerera buri munyamuryango wa Kiyovu Sports kujya mu myanya y’ubuyobozi, mu gihe indi ikumira abatamaze amezi atandatu mu muryango.

RGB yasubije Kiyovu Sports Association ko amategeko ngengamikorere y’umuryango agomba kugendana n’amategekoshingiro yayo, aho uyu muryango wasabwe kubahiriza amategekoshingiro yo kuwa 18 Nyakanga 2012 yashyikirijwe RGB kuwa 23 Kanama 2013.

Mu buryo bwumvikana, nyuma y’ubujyanama bwa RGB ku matora ya Kiyovu Sports Association yabaye kuri iki cyumweru tariki ya 27 Nzeri 2020, Mvukiyehe Juvénal n’abandi bataramara amezi atandatu muri uyu muryango, bari bemerewe kujya mu myanya y’ubuyobozi.

Mbere byari byitezwe ko umwanya w’ubuyobozi bwa Kiyovu Sports Juvénal yari kuwuhatanira n’uwahoze ari Visi perezida w’iyi kipe Ntwarindwa Theodore, aho aba bombi bifuzaga kwiyamamariza kuyobora iyi kipe, n’ubwo icyo gihe nta n’umwe wigeze abitangaza ku mugaragaro.

Gusa kuza kwa Juvénal muri Kiyovu Sports byatunye hatangira kugaragaramo umwuka utari mwiza hagati ye na Theodore, ndetse nyuma haje gutumizwa inama, maze biciye mu biganiro, byarangiye Juvénal naTheodore biyunze ndetse basezeranya abari bahari ko biyemeje guhuza imbaraga, maze bakavuga rumwe.

Gusa nyuma Theodore wari Visi Perezida w’iyi kipe yaje kwerura avuga ko ataziyamamaza, bihita biba byiza kuri Juvénal wagaragaje inyota yo kuyobora iyi kipe.

Kugeza ubu ikipe ya Kiyovu Sports ishaka kuzaza ihatanira ibikombe, yasinyishije umunyezamu Kimenyi Yves, myugariro Irambona Eric bombi bavuye muri Rayon Sports, Eric Ngendahimana ukina hagati we akaba yarakiniraga Police FC, Ngandu Omar wakiniye APR FC na As Kigali, Bigirimana Abed wahoze muri Rukinzo FC y’i Burundi ndetse na rutahizamu Samson Baboua wakiniraga Sunrise FC.

Igitegerejwe kurebwa kindi, n’ukubona umutoza Olivier Karekezi nabo bazafatanya bose basinya amasezerano, dore ko bari gusinyira hamwe mu gihe Juvénal yari kuba amaze gutorerwa kuyobora iyi kipe.

Bivugwa kandi ko Juvénal yahaye iyi kipe imodoka yo kujya ikoreshwa n’abakinnyi, bava cyangwa bajya mu myitozo ndetse no ku mikino izajya iba yakinnye.