![USA: Televiziyo yerekanye ibiranga umuco n’amateka y’u Rwanda [ Amafoto]](https://rwandaforbes.com/wp-content/uploads/2021/03/IMG_1995-360x180.jpg)
Akarere ka Bugesera muri gahunda yo gutera ibiti bivangwa n’imyaka abaturage barasabwa kubigira intego mu kurushaho gufata neza ubutaka, kuko bizarinda ubutaka kuma bukarushaho gutanga umusaruro no guhangana n’imihindagurikire y’ibihe.
Bamwe mu batuye mu mirenge ya Musenyi na Mareba baravuga ko gutera ibiti bivangwa n’imyaka hakenewe kongerwamo imbaraga kuko Bugesera ikeneye ibiti n’ubwo hari ibyari byatewe byahuye n’izuba bikuma ibindi bigahura n’imiswa kandi byari byitezweho umusaruro .
Nyirankizuru Patricie wo mu murenge wa Musenyi avuga ko bishimiye gutera ibiti bivangwa n’imyaka mu gufata neza ubutaka bwabo ariko kuba hari ibyangirika bidakuze ibindi bigakura nabi bidindiza iyi gahunda. Ati“ Duhora dutera ibiti bimwe bikamera ibindi bikuma ariko ntabwo ducika intege tuzakomeza kuko akarere kacu dukeneye ibiti.”
Nzirorera Jean Pierre wo mu murenge wa Ruhuha mu kagari ka Rugarama ,avuga ko afite ibiti 5 mu isambu ye bimwe bitangiye no gutanga umusaruro uretse ko bimwe biribwa n’imiswa ntibikure neza. Ati “ Igiti gifite agaciro kuko bidufatira ubutaka tubivanaho inkwi zo gucana , ibindi bikaduha imbuto zo kurya. Ikindi ubutaka buteyemo ibiti ntabwo bukunze kumagara cyane .”
Mu murenge wa Ruhuha ingamba zo gutera ibiti bivangwa n’imyaka zizakomeza gukorwa aho umuturage muri uyu mwaka azahabwa ibiti bine byo kuvanga n’imyaka .
Ruzabiriza Vital Umunyamanga Nshingwabikorwa w’umurenge wa Ruhuha yaganira n’ ikinyamakuru Muhabura.rw avuga ko ibiti bivangwa n’imyaka bizaterwa ku butaka bwa hegitare 125 byiganjemo ibitanga imbuto ziribwa hanasimbuzwa ibyariwe n’umuswa .
Madam Umwali Angelique umuyobozi w’akarere wungirije ushinzwe iterambere ry’ubukungu avuga ko gahunda yo gutera ibiti bivangwa n’imyaka bayishyizemo imbaraga kuko izakemura ibibazo by’izuba rikabije ryumisha ubutaka bwa Bugesera .
Agira ati “ Kuba duhora dukangurira abaturage gutera ibiti bivangwa n’imyaka ntidushaka ko bugesera ihinduka ubutayu. Ibiti bivangwa n’imyaka bifata ubutaka bikaburinda kuma kuko bituma buhora buhehereye , kandi n’iyo imvura iguye ntabwo isuri ishobora kubutwara. Dufite amatsinda y’inshuti z’ibidukikije adufasha gukurikirana ibiti biterwa byaba ibivangwa n’imyaka ndetse n’ibiterwa ku muhanda.”
Bimwe mu biti bivangwa n’imyaka bizaterwa mu karere ka Bugesera harimo iby’imbuto ziribwa ari byo imyembe ,ipapayi n’ avoka ndetse nibitanga ubwatsi bw’amatungo inkwi no gusasiza ibihingwa ari byo gereveriya ,gasiha na kariyandara .
Buri mwaka , mu kwezi kwa cumi mu gihugu hose hizihizwa icyumweru cyahariwe gutera ibiti .
Muri uyu mwaka w’imihigo wa 2020-2021 akarere ka Bugesera gafite umuhigo wo gutera ibiti bivangwa n’imyaka ingemwe ibihumbi 100 zizaterwa ku buso bungana na Hectari 2680,4.
