![USA: Televiziyo yerekanye ibiranga umuco n’amateka y’u Rwanda [ Amafoto]](https://rwandaforbes.com/wp-content/uploads/2021/03/IMG_1995-360x180.jpg)
Si ubwa mbere cyangwa ubwa nyuma u Rwanda rwamaganye raporo zishinja Ingabo z’u Rwanda kuba vugwa ku butaka bwa Repubulika Iharanira Demokarasi ya Congo (RDC), kuko ari ibirego biza mu gihe runaka hari ibyo bigamije ariko nyuma y’ikindi gihe bigasubikwa ntacyo zigezeho kuko nta gihamya ifatika iba igaragara.
Perrezida wa Repubulika y’u Rwanda Paul Kagame, ubwo yagiranaga ikiganiro n’abanyamakuru tariki ya tariki 27 Mata 2020, yashimangiye ko ibyo birego bimaze imyaka 26 aho usanga imiryango na zimwe mu mpuguke zirengagiza umutwe wa FDLR wahungiye muri icyo Gihugu nyuma yo Gukora Jenoside yakorewe Abatutsi mu Rwanda, n’indi mitwe itabarika ikomeje kwidegembya muri icyo Gihugu ihungabanya umutekano w’Akarere.
Yagize ati: “Hari abitwa impuguke bakoreye muri aka Karere imyaka 26 yose ishize, ariko ugasanga bavuga inkuru mpimbano imwe. Ntungurwa n’uburyo zimwe muri izo mpuguke zitabona ibiri muri ako gace byakabaye bibonwa na buri wese uhari, ahubwo zikabona ibidahari. Nta musirikare n’umwe wa RDF wigeze akandagira ku butaka bwa RDC, ndetse na Leta y’icyo Gihugu irabizi.”
Kwirengagiza ibibazo biri muri icyo Gihugu, ugasanga imitwe yica abaturage igasahura umutungo w’Igihugu igasa n’itahakorera, ngo biterwa ahanini n’inyungu abakora raporo baba bafite mu gukomeza kubona Repubulika Iharanira Demokarasi ya Congo gusigingira mu bijyanye n’amahoro n’umutekano birambye.
Muri iyi minsi ibyo birego byongeye kumvikana, ubwo abitwa inzobere z’Umuryango w’Abibumbye batangaje raporo igaragaza ko Ingabo z’u Rwanda n;’iz’u Burundi zagaragaye ku butaka bwa Repubulika Iharanira Demokarasi ya Congo mu gihe kirenga umwaka wose.
Izo mpuguke zivuga ko zabonye amafoto, amashusho yafatiwe mu kirere n’ubuhamya bw’abantu 20 bemeje ibikorwa by’ingabo z’u Rwanda mu ntara ya Kivu y’Amajyaruguru muri RDC, hagati y’impera z’umwaka wa 2019 n’ukwezi k’Ukwakira 2020.
Guverinoma y’u Rwarnda yasubije mu nyandiko inyomoza ibyatangajwe muri iyo raporo yasohotse tariki ya 23 Ukuboza 2020, ishimangira ko nta musirikare w’u Rwanda uri ku butaka bw’icyo gihugu.
Guverinoma y’u Rwanda yahamije ko kuri ubu nta bikorwa Ingabo z’u Rwanda (RDF) zihuriyeho n’ingabo za RDC (FARDC), nubwo Leta z’ibihugu byombi kuri ubu zifitanye umubano mwiza mu bya dipolomasi.
U Rwanda rwemera ko hari ubufatanye bukomeje gutunganywa hagati yarwo na RDC burimo n’ubwa gisirikare, ariko bugarukira ku bikorwa byo guhanahana amakuru n’iperereza rigamije guhangana n’imitwe yitwaje intwaro ihungabanya umutekano w’ibihugu byombi, uwo mu Karere k’Ibiyaga Bigari no muri Afurika y’Iburasirazuba.
Nanone kandi u Rwanda rushimangira ko rufitanye imikoranire myiza n’ibihugu byo mu Karere, ijyanye no kubungabunga umutungo kamere hagamijwe gukumira ubucuruzi bw’amabuye y’agaciro butemewe.
Guverinoma y’u Rwanda itangaza ko itewe impungenge n’iryo tsinda ry’impuguke ritabashije kuzuza inshingano zaryo neza, bikaba bigaragaza ko raporo yakozwe mu buryo bubogamye kubera izindi nyungu zishobora kuba zibyihishe inyuma.
Nubwo Leta y’u rwanda yahaye izo mpuguke ubufasha bwose bwo kubona ibihamya bigaragaza ko nta musirikare w’u rwanda uri muri icyo Gihugu, byarangiyeizo mpuguke zitengagize burundu uruhande rw’u Rwanda, zogendera ku batangabuhamya bashobora kuba barimo n’abahunze bagerageza guhungabanya umutekano warwo.
