Guverineri wa Banki Nkuru y’u Rwanda (BNR) Rwangombwa John yagizwe Guverineri wa Banki w’Umwaka wa 2021 n’Ikinyamakuru The Banker cyandika ku Bukungu, akaba ari ku rutonde rw’abayobozi bakuru ba Banki Nkuru bagize uruhare mu gushyigikira ubukungu bw’Ibihugu no gushyira ku murongo ubukungu bwahungabanyijwe n’icyorezo cya COVID-19 mu mwaka wa 2020.
Icyo kinyamakuru mpuzamahanga cy’ubukungu cyashinzwe na Financial Times Ltd kikaba gikora ubushakashatsi ku bukungu bw’ibihugu bitandukanye, kigatangaza amakuru ndetse kikaba kinatanga ibihembo bitandukanye ku bayobozi mu nzego z’ubukungu.
Igihe u Rwanda rwinjiraga mu bihe bidasanzwe by’icyorezo cya COVID-19 cyagize ingaruka zikomeye ku bukungu bw’Igihugu, Banki Nkuru y’u Rwanda (BNR) yagaragaje ko ifite uruhare rukomeye mu kurinda ubukungu bw’Igihugu n’ubw’abaturarwanda muri rusange.
Ibyo biri mu bimwe mu byatanze isura nziza y’ubuyobozi bwa BNR mu mwaka ushize wa 2020, bituma Guverineri Rwangombwa John agirwa Guverineri w’Umwaka wa 2021.
Mu gihe gito icyorezo kigeze mu Rwanda, itangazo rya mbere rya BNR ryari iryo gutanga ihumure kuri rubanda ko iyo banki izakomeza gutanga serivisi z’ingenzi ndetse inashishikariza abakiriya bayo kuyoboka ikoranabuhanga.
The Banker ivuga ko kuba Guverineri Rwangombwa amaze igihe ku buyobozi bwa BNR bishimangira ubushobozi n’ubuhanga bwe. Yatangiye kuyiyobora mu mwaka wa 2013, nyuma y’igihe cyari gishize akora muri Minisiteri y’Imari n’Igenamigambi (MINECOFIN).
Yasoje Manda ya mbere mu mwaka wa 2019, yongererwa indi y’imyaka 6 cyane ko igihe amaze ku buyobozi BNR yageze ku iterambere rifatika aho ikomeje guhanga udushya mu rwego rwo koroshya serivisi z’imari mu Rwanda.
Gufasha Igihugu kugera ku ntego yo guhererekanya amafaranga hifashishijwe ikoranabuhanga ni imwe mu ntego nyamukuru za Guverineri Rwangombwa, ndetse BNR yatangije ubukangurambaga bukomatanyije bwatumye kugeza ubu serivisi z’imari zigera kuri benshi.
Na none guharanira ko serivisi z’imari zigera kuri benshi hifashishijwe ikoranabuhanga byagize uruhare rukomeye mu guhangana n’icyorezo cya COVID-19.
Muri Werurwe, BNR yatangaje ko serivisi zo guhererekanya amafaranga hifashishijwe telefoni igendanwa n’ubundi buryo bwo kwishurana abantu badakoranyeho bwagizwe ubuntu mu gihe cyamezi agera kuri ane mu rwego rwo gugushishijariza abaturage kwitabira gukoresha ikoranabuhanga.
Ibyo byatumye serivisi zo kugura no kugurisha hifashishijwe ikoranabuhanga zigira uruhare mu kongera Umusaruro Mbumbe w’Igihugu (GDB) ku kigero cya 54% kugeza muri Kamena 2020; bivuze ko u Rwanda ruri mu murongo mwiza wo kuba rwesheje umuhigo wo kugera kuri 80% bitarenze mu 2024.
Urwego rw’amabanki mu Rwanda rwakomeje gushikama mu bihe bigoye bya COVID-19, banki zikaba zarakomeje gutanga serivisi z’imari mu bushobozi zagiye zongererwa n’ubwo zari zisanganywe.
Ibyo byatewe n’uko BNR yihuse mu gufata ibyemezo byatumye banki zitagwa mu bihombo- igabanya inyungu fatizo kuri za banki ziva kuri 5% igera kuri 4%, bituma banki zibona ingoboka ya miliyari 23 z’amafaranga y’u Rwanda.
BNR kandi yatangaje ko yashyizeho ikigega cya miriyari 50 z’amafaranga y’u Rwanda zigamije gushyigikira banki muri ibi bihe bya COVID-19; kugeza ubu 12% byayo ni yo amaze gusabwa n’amabanki.
Rwangombwa yagize ati: “Kurasa ku ntego ya BNR yo guharanira umutekano w’amafaranga byari bimenyerewe mu bihe bisanzwe, ariko gukomeza uwo mujyo mu bihe bidasanzwe bya COVID-19 byaradufashije. Byasabye gushyiraho poritiki zihuse ariko zishingiye ku makuru yizewe, byose bishingira ku rwego rw’imari rutajegajega no kuba ikirere cy’ubucuruzi kimeze neza mu Rwanda.
Nubwo igihanganye n’ingaruka za COVID-19, BNR ikomeje kuvugurura ikoranabuhanga rikomatanyinje rizoroshya imitangire ya serivisi zo kwishyura cyane cyane ku mipaka (Rwanda Integrated Payment Processing System), rikaba rizatangira gukoreshwa muri Gashyantare 2021.
Iryo koranabuhanga rizagira uruhare mu kunoza ubucuruzi bukorwa mu isoko Rusange ry’Afurika (AfCTA) u Rwanda rutangira gushyira mu bikorwa guhera kuri uyu wa Gatanu tariki ya 1 Mutarama 2021.
Rwangombwa yakomeje avuga ko u Rwanda rukomeje no gutegerezanya ubwuzu Ikigo Mpuzamahanga gishinzwe Ibikorwa by’Ubucuruzi n’Imari cya Kigali (KIFC/Kigali International Financial Center) kizagira uruhare rukomeye mu iterambere ry’urwego rw’imari muri Afurika.
