![USA: Televiziyo yerekanye ibiranga umuco n’amateka y’u Rwanda [ Amafoto]](https://rwandaforbes.com/wp-content/uploads/2021/03/IMG_1995-360x180.jpg)
Minisiteri ya Siporo yahagaritse imikino n’imyitozo yose ya Shampiyona y’Igihugu y’Umupira w’amaguru guhera kuri uyu wa Gatandatu kubera icyorezo cya COVID-19, abakinnyi n’abatoza basabwa kwipimisha mbere yo gusubira mu ngo zabo.
Ni icyemezo iyi Minisiteri yatangaje ko cyafashwe hashingiwe ku bugenzuzi bwakozwe, bukagaragaza ko hari aho amakipe acumbitse abakinnyi basohoka cyangwa bagasurwa, kandi amabwiriza yo kwirinda COVID-19 atabyemera.
Ibyo bigahuzwa n’uko ibipimo bya COVID-19 bimaze gufatwa mu makipe yo mu cyiciro cya mbere muri shampiyona y’igihugu y’umupira w’amaguru kuva yatangira ku wa Ukuboza 2020, bikomeje kugaragaza ubwandu mu bakinnyi.
Itangazo rikomeza riti “Minisiteri ya Siporo imaze kubijyaho inama n’inzego zishinzwe kurwanya icyorezo cya COVID-19 ku rwego rw’igihugu, itangaje ko imikino yose n’imyitozo yose ya Shampiyona y’Igihugu y’Umupira w’amaguru y’umwaka wa 2020/2021, ihagaze guhera tariki ya 12 Ukuboza 2020.”
“Abakinnyi b’amakipe ntibemerewe gusohoka aho bacumbitse basubira mu ngo zabo batabanje gupimwa COVID-19 no kubona ibisubizo. FERWAFA itegetswe kwishyura amafaranga yose ajyanye no gupimisha abakinnyi n’abatoza bose bari bitabiriye imikino ya shampiyona.”
Iki cyemezo gifashwe nyuma y’uko Rayon Sports imaze kugaragaramo abakinnyi 12 banduye COVID-19 ubu ikaba iri mu kato, kimwe na Rutsiro FC zahuye ku munsi wa mbere wa Shampiyona ku wa Gatanu w’icyumweru gishize.
Minisiteri kandi yafashe iki cyemezo gikomeye hanashingiwe ku igenzura ryakozwe mu gihe hasozwaga amarushanwa y’amakipe yo mu cyiciro cya kabiri, rikagaragaza ko ingamba zo kwirinda no gukumira COVID-19 aho amakipe acumbitse zitubahuruzwaga n’amwe mu makipe, amwe aza guhagarikirwa ibikorwa byo kwitoza.
Mu Ugushyingo nibwo Komite Nyobozi ya FERWAFA yahanishije ikipe ya AMAGAJU FC kuvanwa mu irushanwa rya Playoffs, nyuma yo guhamwa n’uburangare bwatumye abakinnyi 11 bayo bandura icyorezo cya COVID-19.
Icyo gihe byatangajwe ko hari umukinnyi witwa Murindwa Evariste waje nyuma y’abandi barageze mu myitozo kandi akaba yarahuye n’abandi bakinnyi bari mu mwiherero ibisubizo by’ibipimo bya COVID-19 yafashwe bitarasohoka. Ibi bikaba byaratumye abakinnyi 11 bandura COVID-19.
Rayon Sports na yo ishinjwa uburangare bwo kujya gukina na Rutsiro FC abakinnyi bamwe batarabona ibisubizo byabo, biza kugaragara ko bagiye mu kibuga kandi baranduye COVID-19.
Kuri uyu wa Gatanu Minisiteri y’Ubuzima yatangaje ko umugabo w’imyaka 71 y’amavuko yabaye umuntu wa 54 wishwe n’iki cyorezo mu Rwanda mu gihe umubare w’abamaze kwandura wo wazamutse ukiyongeraho 79 bigatuma baba 6428. Kugeza ubu abakirwaye ni 548.
Minisiteri ya Siporo yatangaje ko igihe shampiyona izasubukurirwa kizatangazwa mu gihe gikwiye.
Iyi shampiyona ihagaritswe nyuma y’uko kuri uyu wa Gatanu APR FC yatsinze Kiyovu Sports 1-0, naho Marine FC inganya 1-1 na Sunrise FC.
Shampiyona y’Umupira w’Amaguru yahagaritswe kubera COVID-19, FERWAFA itegekwa gupimisha abakinnyi n’abatoza
Uko COVID-19 yibasiye amakipe nyuma y’uko shampiyona isubukuwe
Ku wa 26 Nzeri nibwo Minisiteri ya Siporo yatangaje ko imikino ihuza abantu benshi irimo n’ikinwa abantu bakoranaho nk’umupira w’amaguru, ikomorewe mu gihe yari yarahagaritswe kuva ku wa 14 Werurwe ubwo mu Rwanda habonekaga umurwayi wa mbere wa COVID-19.
APR FC ni yo kipe yabaye iya mbere yapimishije abakozi bayo mbere yo gutangira umwiherero mu ntangiriro z’Ukwakira.
Andi makipe na yo yatangiye iyi gahunda, agendera ku mabwiriza yari yashyizweho na FERWAFA arimo kubanza kugaragaza gahunda n’ingamba zizakurikizwa mu kwirinda icyorezo cya COVID-19 ubwo imyitozo izaba isubukuwe.
Uretse gupimisha abakozi bayo, ibindi byakurikijwe n’amakipe harimo kuba hamwe mu mwiherero, gukoresha imiti yica virusi ku kibuga mbere y’imyitozo, gupima abakinnyi umuriro bakigera ku kibuga ndetse bakabanza gukaraba intoki mbere yo gutangira imyitozo. Abatoza n’abaganga basabwaga kuba bambaye udupfukamunwa ku kibuga.
Hari amakipe yateshutse
Nyuma y’ibyumweru bibiri hatangiye imyitozo, Minisiteri ya Siporo binyuze muri FERWAFA, ni yo yagombaga gusabwa uruhushya rwo gutegura imikino ya gicuti, ariko hari amakipe yakinnye iyo mikino atabifitiye uburenganzira arimo APR FC, Rutsiro FC, Rwamagana City, Rayon Sports na Alpha FC, bityo acibwa amande ari hagati y’ibihumbi 500 Frw na miliyoni 1000 Frw.
Mu mpera za Ugushyingo, mbere y’uko hatangira imikino ya playoffs yo gushaka amakipe abiri azazamuka mu Cyiciro cya Mbere mu mwaka w’imikino wa 2020/21, Minisiteri ya Siporo yahagaritse imyitozo n’umwiherero w’amakipe ya Alpha FC na Vision FC kubera kutubahiriza amabwiriza yo kwirinda COVID-19. Ni mu gihe kandi, ari muri iyo minsi, Amagaju FC yari amaze iminsi mike yemeje ko hari abakinnyi 11 bayo banduye iki cyorezo cyibasiye Isi.
Mbere yo gutangira Shampiyona ku wa 4 Ukuboza, buri kipe yagombaga kubanza kugaragariza FERWAFA ibyavuye mu bipimo byafashwe abakinnyi n’abakozi bayo, ariko hari abatarabyubahirije.
Umukino w’umunsi wa mbere wa Shampiyona wagaragaje icyuho, aho ibisubizo by’ibipimo byagaragaje ko hari abakinnyi bane ba Rayon Sports bakinnye umukino wayihuje na Rutsiro FC barwaye COVID-19 bituma aya makipe yombi ahita ashyirwa mu kato.
Rayon Sports na Rutsiro FC zakorewe ibipimo bitandukanye, ibi byasize iyi kipe yambara ubururu n’umweru yongeye kugaragaramo abandi bakinnyi umunani banduye COVID-19.
Myugariro wa Rayon Sports, Ndizeye Samuel, apimwa COVID-19
Rutahizamu wa APR FC, Usengimana Danny, yerekwa ikigero cy’umuriro afite
Umunyezamu Ahishakiye Hertier akarabywa intoki mbere yo kwinjira mu kibuga cy’imyitozo i Shyorongi
Amakipe yasabwaga kubanza gutera imiti mu kibuga mbere yo kugikoresha
Imipira na yo yagombaga kubanza guterwa imiti mbere yo gusubizwa mu kibuga
